Президент Сўўрўнбай Жээнбеков чегарани очишда чет элдаги эпидемиологик вазиятни ҳисобга олиш кераклигини ва баъзи жойларда пандемия давом этаётганини таъкидлади.
Президентнинг матбуот хизмати Жээнбеков Бош вазир Қубатбек Бўрўнов билан онлайн учрашув ўтказганини маълум қилди. Учрашувда мамлакатдаги эпидемиологик вазият, мамлакатнинг ижтимоий-иқтисодий ривожланиши, ташқи чегараларнинг очилиши, куз-қиш мавсумига тайёргарлик ва янги ўқув йилига оид масалалар муҳокама қилинди.
Жээнбеков мамлакатдаги эпидемиологик вазият яхшиланишига қарамай, Қирғизистон фуқароларини шахсий интизом ва барча санитария меъёрларига риоя этилиши ҳақида огоҳликни давом эттиришга чақирди.
Бўрўнов карантин чораларини босқичма-босқич олиб ташлашга тайёргарлик кўрилаётгани, транспорт алоқаларини паритет асосда тиклаш бўйича хорижий давлатлар билан олиб борилаётган музокаралар ҳақида маълумот берди.
Бош вазир мамлакат аэропортлари кун бўйи йўловчиларга санитария-гигиена талабларига мувофиқ хизмат кўрсатишга тайёрлигини айтди. Унга кўра, барча керакли воситалар ўрнатилди ва тегишли алгоритмлар ишлаб чиқилди.
«Президент вилоятларга қилган ташрифлари натижасида молиявий институтларнинг, шу жумладан Россия-Қирғизистон Тараққиёт жамғармасининг экспортга йўналтирилган корхоналарга имтиёзли кредитлар бериш бўйича ишини мамнуният билан қайд этди», дейилади баёнотда.
У «Рақамли зона» лойиҳаси ва «Шимолий» идоралараро ҳамкорлик электрон тизимига давлат идораларининг интеграцияси бўйича лойиҳаларни амалга ошириш устидан назоратни кучайтиришга эътибор қаратган.
Жээнбеков ҳукуматни давлат-хусусий шериклик асосида лойиҳалар бўйича ишларни фаоллаштиришга чақирди. У куз-қиш мавсумига ўз вақтида тайёргарлик кўриш, вилоятлардаги шошилинч касалхоналар ва мактабларни таъмирлаш ишларини тезкор якунлаш муҳимлигини таъкидлади.
